Калядная забава у дзіцячым садку

15 студзеня 2025 года ў дзяржаўнай установе адукацыі «Дзіцячы сад № 11 г. Магілёва» адбылася фальклорная музычная забава «Каляды». Галоўная мэта мерапрыемства — развіццё ў выхаванцаў устойлівай цікавасці да беларускай нацыянальнай культуры.

Актыўнымі ўдзельнікамі забавы сталі выхаванцы старэйшых і сярэдніх груп, супрацоўнікі ўстановы дашкольнай адукацыi.

Мабыць, няма іншага свята, якое адзначалася з такім багаццем звычаяў, абрадаў, прыкмет, і таму да каляд у дзіцячым садку рыхтаваліся сур’ёзна і адказна. Педагогі загадзя знаёмілі выхаванцаў з гісторыяй свята, з традыцыямі, якія яго суправаджаюць. На музычных занятках выхаванцы развучвалі беларускiя калядныя песнi, карагоды, гульнi.

Праграма мерапрыемства ўключала гульні «Гарлачык», «Дудка», «Міхасік», «Да дзеда ў госці», «У карагодзе мы былі», тэатралізаваныя сцэнкі з удзелам традыцыйных калядных персанажаў, «варажбу», карагоды. I ўсе гэта стварыла непаўторную атмасферу каляднай весялосці.

Мерапрыемства праходзіла ў музычнай зале, а потым калядоўшчыкі павіншавалі выхаванцаў усіх узроставых груп. У ходзе віншавання дзеці знаёміліся з абрадамі калядавання, замацоўвалі раней атрыманыя веды.

Задор і добры настрой падарылі калядоўшчыкі дзецям і дарослым. У іх з’явілася магчымасць дакрануцца да традыцый і звычаяў беларускага народа, далучыцца да вытокаў народнай культуры.

Шеверда Н.В., загадчык ДУА «Дзіцячы сад № 32 г. Магілёва»